साउदीमा ड्रोनको भग्नावशेष लागेर नेपालीसहित दुई विदेशीको मृत्यु

साउदी अरबको पूर्वी क्षेत्रमा रहेको सायबाह तेल खानीमा ड्रोनलाई हवाई प्रतिरक्षा प्रणालीले निष्क्रिय पारेपछि खसेको भग्नावशेष लागेर एक नेपालीसहित दुई विदेशी नागरिकको मृत्यु भएको छ। घटनामा एक भारतीय र एक पाकिस्तानी नागरिक घाइते भएका छन्। 

साउदी ऊर्जा मन्त्रालयका अनुसार बुधबार बिहान साउदी अरामकोको तेल प्रशोधन केन्द्रलाई लक्षित गरी आएको ड्रोनलाई आकाशमै निष्क्रिय पारिएको थियो। त्यस क्रममा खसेको भग्नावशेषले तेल खानीको बाहिरी क्षेत्रमा रहेको ठेकेदार कम्पनीको गाडीमा आगलागी भएको थियो।

मृत्यु हुनेमा नेपाली र फिलिपिन्सका नागरिक रहेका छन्। घटनाबाट तेल खानीको नियमित सञ्चालनमा भने असर नपरेको साउदी अधिकारीहरूले जनाएका छन्।