सरकारको कार्यशैलीप्रति प्रचण्डको असन्तुष्टि, भने– हिन्दी जासुसी फिल्मजस्तै अनिश्चित

नेपाली कम्युनिस्ट पार्टी (नेकपा) का संयोजक पुष्पकमल दाहाल ‘प्रचण्ड’ले वर्तमान सरकारको कार्यशैलीप्रति असन्तुष्टि जनाउँदै त्यसलाई हिन्दी जासुसी फिल्मसँग तुलना गरेका छन्।

शनिबार काठमाडौंमा आयोजित एक कार्यक्रमलाई सम्बोधन गर्दै प्रचण्डले सरकारका गतिविधि अपारदर्शी, अनिश्चित र अन्योलपूर्ण बन्दै गएको टिप्पणी गरेका हुन्।

उनले हिन्दी जासुसी फिल्ममा वास्तविकतामा सम्भव नहुने तथा हुँदै नभएका घटनासमेत देखाइने प्रसंग उल्लेख गर्दै सरकारका कामकारबाही पनि त्यस्तै देखिन थालेको बताए।

प्रचण्डका अनुसार अहिले मुलुकमा कुन बेला कुन पत्रकार पक्राउ पर्ने, कसैमाथि कहिले आक्रमण हुने, कर्मचारीतन्त्रका अधिकारी तथा राजनीतिक नेताहरूमाथि के हुने भन्ने निश्चित अवस्था छैन। यस्तो अनिश्चितताले समाजमा अन्योल र अशान्त वातावरण सिर्जना गरेको उनको भनाइ थियो।

उनले सरकारको कार्यशैलीले राज्यका विभिन्न क्षेत्रका व्यक्तिहरूमा असुरक्षा र अन्योल बढाएको दाबी गरे।

पुराना राजनीतिक दलको योगदान बिर्सन खोजिएको आरोप

सम्बोधनका क्रममा प्रचण्डले पुराना राजनीतिक दल र तिनका नेतृत्वप्रति वर्तमान सत्ता पक्ष तथा नयाँ पुस्ताबाट भइरहेको नकारात्मक टिप्पणीप्रति पनि आपत्ति जनाए।

गणतन्त्र स्थापना, भौतिक पूर्वाधार निर्माण र ऊर्जा क्षेत्रमा भएका उपलब्धिमा योगदान पुर्‍याएका राजनीतिक शक्तिहरूलाई समेत गलत रूपमा प्रस्तुत गर्न खोजिएको उनको गुनासो थियो।

उनले गणतन्त्र ल्याउन, पूर्वाधार विकास गर्न र ऊर्जा क्षेत्रमा परिवर्तनका लागि काम गर्नेहरूलाई कुनै योगदान नगरेका तथा बदमास र अपराधीका रूपमा चित्रण गर्न खोजिएको बताए।

प्रचण्डले राजनीतिक इतिहास र विगतका उपलब्धिलाई बेवास्ता गरेर पुराना दलहरूको भूमिकामाथि नकारात्मक भाष्य निर्माण गर्नु उचित नभएको आशय व्यक्त गरे।

उनको अभिव्यक्तिले वर्तमान सरकारको कार्यशैली र पुराना राजनीतिक दलको योगदानलाई लिएर राजनीतिक वृत्तमा भइरहेको बहसलाई फेरि सतहमा ल्याएको छ।