मोटर जडान गरिएको धाराबाट पानी खाने क्रममा करेन्ट लाग्दा युवकको मृत्यु

बारा । पचरौता नगरपालिका–८, बाझोपटीमा मोटर जडान गरिएको धाराबाट पानी खाने क्रममा करेन्ट लागेर २५ वर्षीय राजु देवनको मृत्यु भएको छ।

महागढीमाई नगरपालिका–८ बेतौनाका हकबुला देवनका छोरा राजुलाई असोज १० गते साँझ करिब ६ बजे साथीको घरमा पानी खाने क्रममा करेन्ट लागेको प्रहरीले जनाएको छ। करेन्ट लागेर घाइते भएका उनलाई तत्काल एम्बुलेन्समार्फत प्रादेशिक अस्पताल कलैया पुर्‍याइएको थियो।

अस्पतालमा चिकित्सकले ECG परीक्षणपछि साँझ ६ः४५ बजे उनलाई मृत घोषणा गरेका थिए। घटनापछि प्रहरी टोली घटनास्थलमा पुगेर मुचुल्कालगायत आवश्यक अनुसन्धान अघि बढाएको थियो।

पोस्टमार्टमपछि असोज ११ गते मृतकका दाइले शव बुझेर लगेका छन्। घटनाबारे थप अनुसन्धान भइरहेको प्रहरीले जनाएको छ।