पृथ्वी राजमार्गका सात स्थानमा पहिरो, दुई ठाउँमा सडक पूर्ण अवरुद्ध

अविरल वर्षापछि पृथ्वी राजमार्गअन्तर्गत धादिङका विभिन्न सात स्थानमा पहिरो खसेको छ। पहिरोका कारण दुई स्थानमा सडक पूर्ण रूपमा अवरुद्ध भएको प्रहरीले जनाएको छ।

कृष्णभिर, परेवाभिर, ज्यामिरेघाट, जहरे, जवाङखोला, तिगराङ खोला र कमेरेभिरमा पहिरो गएको हो। कृष्णभिर र तिगराङ खोलामा दुवैतर्फको सडक अवरुद्ध छ भने अन्य स्थानमा एकतर्फी रूपमा यातायात सञ्चालन भइरहेको छ।

कृष्णभिरमा उपकरण प्रयोग गरी पहिरो हटाउने काम भइरहेको भए पनि निरन्तर वर्षाका कारण सडक तत्काल पूर्ण रूपमा सञ्चालनमा ल्याउन कठिनाइ भइरहेको प्रहरीले जनाएको छ। 

यात्रु तथा चालकलाई सडकको अवस्था बुझेर मात्र यात्रा गर्न र जोखिमयुक्त क्षेत्रमा सावधानी अपनाउन आग्रह गरिएको छ।