जीतपुरमा ८० ग्राम ब्राउन सुगरसहित दुई जना पक्राउ

जीतपुरसिमरा उपमहानगरपालिका–५ स्थित अशोक स्टील नजिकबाट सशस्त्र प्रहरीले ८० ग्राम ब्राउन सुगरसहित दुई जनालाई पक्राउ गरेको छ। 

पक्राउ पर्नेमा पर्साको सखुवाप्रसौनी–४ का २८ वर्षीय हुस नयन अंसारी र वीरगन्ज–१४ का १८ वर्षीय राजन पासवान रहेको सशस्त्र प्रहरीले जनाएको छ। वीरगन्जबाट पथलैयातर्फ जाँदै गरेको मोटरसाइकलमा सवार उनीहरूलाई सशस्त्र प्रहरीको औद्योगिक सुरक्षा बेस जीतपुरबाट खटिएको टोलीले नियन्त्रणमा लिएको हो। उनीहरूलाई आवश्यक अनुसन्धान तथा कानुनी कारबाहीका लागि इलाका प्रहरी कार्यालय सिमरामा बुझाइएको प्रहरीले जनाएको छ।