दसैँको टीका लगाउने क्रम जारी, आफन्तकहाँ जानेको चहलपहल

बडादसैँअन्तर्गत विजयादशमीको  दोश्रो दिन  अन्तर्गत आज एकादशीका दिन पनि देशभर मान्यजनको हातबाट टीका र जमरा लगाउने क्रम जारी छ। विजयादशमीका दिन टीका लगाउन नभ्याएका तथा टाढा रहेका आफन्त र मान्यजनकहाँ पुग्नेहरू बिहानैदेखि टीका थाप्न जाने गरेका छन्।

दसैँमा मान्यजनले आफूभन्दा सानालाई निधारमा रातो टीका र कानमा जमरा लगाइदिँदै सुख, शान्ति, सुस्वास्थ्य, दीर्घायु र प्रगतिको आशीर्वाद दिने परम्परा छ। यही परम्पराअनुसार परिवार तथा आफन्तजनबीच भेटघाट गर्ने र खुसी साटासाट गर्ने क्रम चलिरहेको छ।

विजयादशमीदेखि सुरु भएको टीका लगाउने क्रम कोजाग्रत पूर्णिमासम्म जारी रहने धार्मिक मान्यता छ। काठमाडौं उपत्यकासहित देशका विभिन्न स्थानमा आफन्तकहाँ टीका थाप्न जानेहरूको चहलपहलले दसैँको उत्सवलाई निरन्तरता दिएको छ।