रौतहटमा अज्ञात समूहको गोली प्रहारबाट २८ वर्षीय युवक घाइते

रौतहटको सदरमुकाम गौरमा अज्ञात समूहले गोली प्रहार गर्दा एक युवक घाइते भएका छन्। गौर नगरपालिका–४ गढवा टोलस्थित पानी ट्यांकी नजिक मंगलबार राति भएको घटनामा स्थानीय २८ वर्षीय राकेश यादव घाइते भएका हुन्।

जिल्ला प्रहरी कार्यालय रौतहटका अनुसार राति करिब ९:१५ बजे यादवमाथि गोली प्रहार भएको थियो। गोलीका छर्रा लागेर उनको ढाडमा तीन, दाहिने पाखुरामा एक तथा दुवै खुट्टामा दुई गरी शरीरका विभिन्न भागमा छवटा चोट लागेको छ।

घटनालगत्तै उनलाई उद्धार गरी प्रादेशिक अस्पताल गौर पुर्‍याइएको थियो। त्यहाँ प्रारम्भिक उपचारपछि थप उपचारका लागि वीरगञ्जस्थित नेपाल मेडिसिटी बयोधा अस्पताल पठाइएको प्रहरीले जनाएको छ। घाइते यादवको अवस्था गम्भीर रहेको बताइएको छ।

प्रहरीले घटनास्थलबाट ७.६२ एमएम पेस्तोलका तीनवटा खाली खोका फेला पारेको जनाएको छ।

यादवमाथि गोली प्रहार गर्ने व्यक्ति वा समूहको पहिचान हुन सकेको छैन। घटनाको कारणसमेत खुल्न नसकेको प्रहरीले जनाएको छ। घटनामा संलग्न व्यक्तिहरूको खोजी तथा घटनाबारे थप अनुसन्धान भइरहेको जिल्ला प्रहरी कार्यालय रौतहटले जानकारी दिएको छ।